Rom 8 | NAS | STEP | Teeꞌkoo enang Kumponinge booꞌkoo miruꞌmuriaꞌ niiꞌ Karistooꞌkoo oꞌnorining.

Romans 8

Karistooꞌke Orara Aarumo Niiꞌketa Ketaꞌpura Tanuaang Meekung Amuruꞌnaꞌ

1 Teeꞌkoo enang Kumponinge booꞌkoo miruꞌmuriaꞌ niiꞌ Karistooꞌkoo oꞌnorining. 2 Aming-koo, nnaꞌ Jiisuuꞌ Karistooꞌ ninka oꞌnoriko Tanuaang Meekung-koong iriꞌke unaa-antamuring teieta orara aarumo bakaang iriꞌketa eeꞌnoko booꞌketa. 3 Botoi tee niiꞌ domang-anta-koo makotuaꞌ mono aruaruꞌoma boto totoꞌpumaung-koo. Teka Kumponinge deekoꞌ niiꞌnung taung nkomemuruꞌ niiꞌ mooꞌmuriiꞌnaang. Tee Bauring narung masikung botovuuꞌ tee-pinaꞌ niikaang mono-pinaꞌ oroꞌparioꞌ, nka tee niiꞌpinaꞌ orara aarumo-poꞌnung deeaꞌ. Poraiꞌnang tee orara aarumo-koong iriꞌ pesiꞌuuꞌ bakaang mono booma niiꞌkoo parekavarama. 4 Tee booꞌparioꞌ enang niiꞌ makosi tampaꞌ otoꞌkoo teie botoi botomurimanaꞌ nko-koo Tanuaang Meekunge taremurioꞌ, eeꞌnoko siompampiaukaꞌ tee urikung aarumo orara.

5 Teing nantoong mono bakanameng siompaamaing tee biikaang noruꞌ mono bakanameng-koo pinkaꞌarimaung. Teka teing nantoong Tanuaang Meekung bakanameng siompaamaing tee biikaang noruꞌ Tanuaang Meekung bakanameng-koo pinkaꞌarimaung. 6 Teing nantoong biikaang noruꞌ mono bakanameng-koo pinkaꞌariaining tee booroaining. Teka teing nantoong biikaang noruꞌ Tanuaang Meekung bakanameng-koo pinkaꞌariaining tee domampariaing eeꞌnoko mooa-koo otoroaing. 7 Tee noruꞌ mono bakanamenge otomaung tee Kumponing-koo tooꞌdenung, Kumponing-nung boto-koo kupiꞌomaung, bakei makotuaꞌ niiꞌnaꞌ nko-koo. 8 Teing mono bakanamenge otoromainge tee Kumponing dotu-antavaavarupeuꞌ. 9 Teka diiꞌ tee mono bakanameng-koo otoriaꞌ, teka Tanuaang Meekung bakanameng-kooning, tee eeꞌnara Tanuaang Meekung Kumponing bakaang diiꞌkoo otoing deekoꞌ. Baa naning Tanuaang Meekung Karistooꞌnung otoꞌevuaung tee, tee bakaang naning deeaꞌ. 10 Teka Karistooꞌ diiꞌkoo otoko deekoꞌ tee, bane mono booꞌparavaing orara aarumo-koo, teka tee diikaang tanuaang domamparavaing Kumponinge koontoꞌnuka tanturuꞌnung-koo. 11 Jiisuuꞌ booꞌketa daaꞌuuꞌnung bakaang Tanuaang diiꞌkoo otoing deekoꞌ teie eeꞌnarai Jiisuuꞌ Karistooꞌ booꞌketa daaꞌuuꞌnunge diikaang mono booꞌkoong domampuaing eeꞌnara bakaang Tanuaang diiꞌkoo otoinge.

Tanuaang Meekunge Niiꞌ Kumponinge Baurukaaꞌ Deeng-antamurimanaꞌ

12 Mmaikoriꞌ ee, bakei navoꞌka kapooꞌ niiꞌke Kumponing bariꞌevompiaing otong bakaang pia siompampira, mono bakaang pia siompampiaꞌ. 13 Mono bakaang pia siomperiaing deekoꞌ tee diiꞌ dooriaing. Teka Tanuaang Meekung bakaang pia siomperima mono-koong aarumo totoꞌperi domantariaing. 14 Teing nantoong Kumponing bakaang Tanuaang Meekunge siong-antavurimaing teing Kumponing baurukaaꞌ. 15 Tee Tanuaang Kumponinge aruruꞌnung diiꞌ avoroꞌke kaiꞌanta-koong deeaꞌ daiꞌnisinuka-pinaꞌ. Nka aampariꞌarioꞌ Kumponing baurukaaꞌ deenturimaung, eeꞌnoko tee eeꞌnara Tanuaang Meekung bakaang iriꞌke amanampiaꞌ Kumponing bokuampimaung eeꞌpinaꞌ: Mmaꞌ ee, Mmaꞌ. 16 Teeꞌkoo Kumponing bakaang Tanuaang niikaang tanuaang ninka narung deemarima niiꞌ siraꞌmarimaung niiꞌ teing Kumponing baurukaaꞌ. 17 Eeꞌnoko niiꞌ Kumponinge baurukaaꞌ deemariko barenku oko-antamuriai Jiisuuꞌ Karistooꞌ ninka, aꞌnooꞌ tee nariꞌ baike kompampira tee ninka deekoꞌ bakaang biraanke nariꞌ kompampiaꞌnaang.

Kumponing Baurukaaꞌke Meenasi Nkavaavainaꞌ Paning-koo

18 Ninge tee eeꞌ noruꞌamaang: Tee kapooꞌnanka baikenanka enanung batei-koo kompampimaatomaung tee kapooꞌ deeaꞌ tee-koo biraanke damaꞌke nkavampiaing-koo. 19 Ookara kapooꞌnanka Kumponinge nkovuruꞌning tee nemparimaung Kumponinge baurukaaꞌ biraankevurima siraꞌantavuriainaꞌmung-koo. 20 Tero ookara kapooꞌnanka nkovuruꞌning barakosiꞌuruꞌ tamunsiꞌnanka deempariiꞌnaang, biiꞌka biikaang noruꞌkoo deeaꞌ, tee Kumponing bakaang noruꞌkoo, kuung otoroi nempaavaꞌnaang bera teꞌmung makotuai Kumponing baurukaaꞌke meenasi nkavaavainaꞌmung. 21 Teꞌmung tee ookara kapooꞌnanka Kumponinge nkovuruꞌning teieta kiimata deraꞌ bakaang-eta unaa-antavurira meenasi basi-antavuaing baurukaaꞌkoo basi-antavuainaꞌ nariꞌ. 22 Niiꞌke noruꞌampiri otong ookara kapooꞌnanka kansiꞌkooninge aaꞌnaꞌ sisikeera toraꞌpaamaung baike amutemuriiꞌ kuneꞌaama eꞌmung doong-koo basinooꞌkoo. 23 Eeꞌnoko teing nkovuruꞌninge nainge deeaꞌ. Bane tutunaꞌnavaro Tanuaang Meekung-koo komariri oꞌnoring, niiꞌke teeꞌ nariꞌ tee sisikeera toraꞌpampimaung nemarima baurukaaꞌpinaꞌ oroꞌantamuriiꞌnaang, niikaang mono mooꞌmurima booꞌnameng-eta. 24 Teeꞌ nariꞌ nkoaravaing-koo masikaꞌantavampiko Kumponinge mooꞌmuruꞌ, kapooꞌ tero oroꞌparuꞌnung-koo narung-koo deeaꞌ, tee kapooꞌ mmeꞌ oroꞌparavaung-koo. 25 Teka masikaꞌanta otoko kapooꞌ ooampiaung-koo tee nemariri oꞌnoriaing dooroonge. 26 Tanuaang Meekunge pakumurimaung niikaang aruaruꞌkoo. Aiꞌ niiꞌke tee tampaꞌ noruꞌampiaꞌ kunsi bakaang taung koontoꞌnavung. Teka tanuaang Meekunge baka eentamemurimaung niiꞌ paku-koo pankaruntoong-eta baiarama karai siraꞌkoo makotuaꞌ. 27 Eeꞌnoko Kumponinge ookara biikaang domang keperuuꞌurimaunge tee noruꞌui otong tee onou Tanuaang Meekung bakaang, Kumponing-pinaꞌ nariꞌ noruꞌaramaung-koo eentavevurima ookara bakaning meekupoong.

28 Eeꞌnoko niiꞌke noruꞌampiri otong teing ookara kapooꞌnanka tavoꞌarimaing niiꞌ tampaꞌ nko-koong niiꞌ Kumponing piaavampimaing eeꞌnoko baremuri bokumuruꞌning. 29 Tero urikamuꞌ Kumponinge tasiꞌpuruꞌ bakaning. Teing tasiꞌpuruꞌning miruꞌuruꞌ bauring-pinaꞌ nariꞌ oroꞌpariri otorooꞌnaang. Eeꞌnoko bauring tee tutunaꞌnung kuraꞌnariꞌkoo kuunga. 30 Eeꞌnoko teing miruꞌuruꞌning tee bokuvuruꞌ. Teing bokuvuruꞌning tee koontoꞌnuka tampuruꞌ, eeꞌnoko teing koontoꞌnuka tampuruꞌning tee nerampuruꞌnung.

Kapooꞌ Otoaꞌ Kumponing Bakaang Piaa-eta Tontaꞌmuripeuꞌnung

31 Tee tee, enang areꞌpampipeuꞌ? Kumponing niikaang pakupaku deemparako niiꞌkoo karenung baa? Otoaꞌ. 32 Teie bauring orokovuaruuꞌnunge niiꞌkoo baike kuneꞌuuꞌnaang, ookara kapooꞌ ee orokovupeuꞌ bauring ninka nariꞌ avuꞌkoo? Makotuaꞌ. 33 Baie tuumpivuripeuꞌ Kumponing bakaning miruꞌniiꞌnuka? Otoaꞌ. Kumponinge eeꞌnarai koontoꞌnuka tampuruꞌnung. 34 Baie booꞌkoo-nupoong miruꞌmuriaing? Otoaꞌ. Jiisuuꞌ Karistooꞌ niiꞌkoo booꞌparuꞌ, eeꞌnoko masikaꞌ Kumponinge booꞌketa daaꞌuioꞌ tampavine-koo Kumponing-koo otong niiꞌ eentamemurima. 35 Baie teꞌnemuripeuꞌnung teieta piaa Karistooꞌ bakaang? Turanturang makotuaꞌ, orarunsi makotuaꞌ, tuumpinang, peera, simpenoiꞌ, avoꞌavoroꞌ eeꞌnoko tavuꞌ, bakei ookara makosiaavaꞌ. 36 Eeꞌ daariari otoinaꞌ niiꞌkoo masikaꞌ otong,

“Dakaang miring-koo niiꞌ teing tamaarimaing ookara doong-koo, maaꞌmaaꞌ tavuꞌkooning-pinaꞌ noruꞌmaarima.”
(Kena 44:22)

37 Nka tee, bane aing ookara kapooꞌ kuneꞌampiainge niiꞌke tee bakei aaꞌnaꞌ puruꞌampiaing Karistooꞌ ninka niiꞌ piaamuruꞌnung ninka. 38 Ninge tee tasiꞌpansi otong kapooꞌ otoaꞌ niiꞌ tankaamuripeuꞌnung Kumponing bakaang piaa-eta Jiisuuꞌ Karistooꞌ niikaang Ovoring-koo oroꞌparuꞌnung-eta, bane aing aaꞌning tavoꞌkuai: booꞌ, domang-anta, koosinunanka, ovontunanka, enang otoroining, kapooꞌ damaꞌ tavoꞌaravaining, iriꞌnanka, detonooꞌ, boonkonooꞌ; 39 Eeꞌnoko niiꞌnung kapooꞌ makosi otoaꞌ napoꞌ Kumponinge nkovuruꞌning-koo.